Hepe sa LCPO nakahilak

CEBU, Philippines - Agi og pagduyog sa kasubo sa mga nabiktima sa katalagman sa Mindanao ang kapolisan sa dakbayan sa Lapulapu mohatag og usa ka trak nga nagkalain-laing pinaskuhan sa mga biktima sa Cagayan de Oro, Iligan ug sa Dumaguete.

Nagpasalamat si Lapulapu City Police Office director Sr. Supt. Anthony Obenza sa iyang mga sakop nga miabag sa iyang panawagan atol sa ilang Christmas party sa milabay’ng Martes nga modonar og hinabang alang sa mga biktima sa kalamidad didto sa Mindanao ug Negros.

Ang kapolisan nakatigom og usa ka truck nga donasyon sa mga kagamitan, delata ug uban pang mga pagkaon lakip na ang ilang ipa-raffle unta nga prizes sa ilang party nga ila nalang gihatag alang sa mga biktima sa baha.

Atol sa usa ka presentasyon sa video sa katalagman nga nahitabo didto sa Cagayan de Oro ug Iligan City diin sobra sa usa ka libo ka tawo ang nangamatay ug gatosan ang missing, mitulo ang luha ni Obenza.

Matud pa ni Obenza dili lalim ang mawagtangan og sakop sa pamilya ilabi na ang mga bata.

Si Obenza mipadayag sa iyang mensahe ngadto sa mga biktima nga dili magpakawala sa paglaom gumikan kay adunay mga tawong motabang ug moagak panahon sa ilang panginahanglan. (BANATNEWS)