Ginang gihapsa'g pistola sa tulisan

CEBU, Philippines -  Napawong ang panan-aw sa usa ka babaye human bunali og puloan sa pistola sa lalaking mitulis kaniya alas-5 pasado ang takna sa miaging buntag sa dalan Hernan Cortes, barangay Subangdaku, dakbayan sa Mandaue.

Si SPO1 Emmanuel Enople miila sa biktima   nga si Cherryll Delos Reyes, 27, taga barangay Tipolo sa nahisgutang dakbayan.

Matud pa ni Enople nga kuyog sa biktima ang iyang bana nag-atang og sakyanan paingon sa dakbayan sa Sugbo dihang gihunongan sa duha ka wala mailhing lalaking luwan sa usa ka motorsiklo ug mition og armas ug mideklarar og tulis.

Ang bana sa biktima nga nakalitan daw giugbok nga kandila nga wala makalihok sa gibarogan apan si Cherryll misulay sa pagkisikisi ug misinggit sa pagpangayog panabang apan kalit kining gihapsan sa puloan sa armas diha sa iyang ulo sa usa sa mga tulisan.

Human niini gibunlot sa tulisan ang shoulder bag sa biktima nga gisudlan sa kwarta, cellphone, ID sa gitrabahoan niining kompaniya ug uban pa nga importanteng dokumento ug nangikyas.

Ang duha gipatan-aw sa rogues gallery sa kapolisan apan wala silay natudlong hulagway sa mga notadong tulisan sa dakbayan diha sa police files. (BANAT NEWS)