Anak ni Gwen nanghatag gasa

CEBU, Philippines - Padayong nagsuroysuroy ang anak ni Governor Gwen Garcia nga si Capitol Consultant on Project and Program Institutionalization Atty. Ma Ezperanza Cristina Garcia Frasco ngadto sa mga kalungsoran aron sa pagpatuman sa programa sa gobernador   nga alang sa mga katigulangan, kababayen-an ug kabataan.

Usa sa mga programa nga gipatuman   ni manlalaban Ma. Ezperanza Cristina Garcia Frasco mao ang medical and dental mission, nga alang sa tanan, Halad kang Lolo ug Lola alang sa mga tiguwang ug ang feeding program alang sa kabataan.

Didto kini ipahigayon sa anak sa gobernador   sa tulo ka mga lungsod nga naglangkob sa Bantayan Island nga mao ang Bantayan, Sta. Fe ug Madridejos niadtong Oktubre 21 ug 22 ning tuiga din mikapin sa lima ka libo ka mga senior citizen ang naalagaran.

Kauban ni manlalaban Frasco sa pagpanghatag og gatas, bugas, tsinelas, antipara, medical check up ug uban pang mga gasa ngadto sa mga lola ug lola mao ang iyang kapikas nga si Liloan mayor Duke Frasco ug mga mayor sa tulo ka lungsod sa isla sa Bantayan. Uban usab sa grupo mao ang mga sakop sa medical team sa probinsiya nga gipangulohan ni Integrated Provincial Health Officer Dr. Cristina Giango.

Gawas sa halad sa gugma alang ni lolo ug lola ug sa libreng medical ug dental mission, gipahigayon usab ni manlalaban Frasco ang usa ka feeding program alang sa kabataan sa isla diin dili mominus sa 500 ka mga bata sa day care ang iyang gipakaon sa lamian ug puno sa sustansya nga lugaw dayon gipainom sila og gatas.

Gipahigayon usab didto ang libreng Anti-Rabies Vaccination alang sa mga iro, ceremonial planting of seeds alang sa matag barangay ug mga proyekto alang sa mga babaye. Gumikan niini gipadangat sa mga mayor sa Isla sa Bantayan nga sila si Mayor Jennifer Illustrisimo sa Santa Fe, Ian Cristopher Escario sa Bantayan ug Madridejos mayor Salvador dela Fuente ang ilang kinasing-kasing nga pasalamat ngadto kang manlalaban Frasco.  - BANAT NEWS