Skydiver naugbok

CEBU, Philippines - Patay ang usa ka skydiver nga Sugbuanon ug tinun-an sa medisina human kini maugbok gikan pag-ambak sa abyon atol sa ilang skydiving session niadtong milabay’ng adlaw diha sa barangay Airport sa syudad sa Ormoc.

Ang biktima giila ni Insp. Virgilio Bayon-on mao si Louie Raymund Pescaño, 24, usa ka tinun-an sa Medisina sa University of Santo Tomas ug molupyo sa Victor Village sa barangay Tisa ning dakbayan.

Sa pakighinabi sa Banat News kang Bayon-on, ang hepe sa kapolisan sa Station 3 sa Ormoc City sakop sa Cebu Sky Diving Club si Pescaño.

Sa nakuha nga impormasyon sa kapolisan nga ang biktima sakay sa usa ka Cessna plane nga gipilotohan ni Capt. Joseph Brent Chiong ug uban sa biktima ang skydiving instructor nga si Garry Soria ug usa ka laing wala mailhing skydiver. Matud pa ni Bayon-on nga sa dihang mi-ambak na ang biktima giingong mituyok-tuyok na kini hangtud sa ubos.

Wala pa hinuon matino kung dunay deperensya ang parachute o kasaypanan ba sa instructor o ba kaha ni Pescaño ang aksidente.

Sumala pa nga naugbok og maayo ang biktima sa kahumayan nga nag-una ang sampot. Daling gidala ang biktima sa Ormoc Sugar Planters Association Hospital (OSPAH) apan giingong dead on arrival na kini tungod sa nahiagumang mga bali sa lawas.

Hinuon aduna pay imbestigasyon nga gihimo ang kapolisan kabahin sa aksidente. Dugang pa ni Bayon-on nga ang amahan sa biktima nga kanhi usab retiradong heneral nga si Orlando giingong mopasaka og kaso sa mga responsable sa nahitabo sa iyang anak. (EIM)