M Lhuillier 'mitagam'

CEBU, Philippines - Mitagam na ang M Lhuillier management sa sunod-sunod nga pagpanulis sa ilang mga opisyal ug kawani nga modala og alahas dinhi sa Sugbu hinungdan nga buot na kini mopa-escort sa kapolisan sa Lapulapu.

Matud pa ni Lapulapu City Police Office Director Sr. Supt. Anthony Obenza ang Security Officer (dili magpaila) sa M Lhuillier personal nga nakigkita kaniya ug mipadayag nga buot na silang magpa-escort sa mga pulis sa Lapulapu kung dunay mga opisyal o kawani nilang maghatud og mga alahas dinhi sa Sugbu agi sa tugpahanan sa Mactan Cebu International Airport.

Apan giklaro sa maong security officer nga dili sila mohatag og pasiunang impormasyon kun kanus-a kini moabot dinhi. Buot nila kung moabot na sila dinhi sa Sugbu una pa sila motawag og polis.

Si Obenza nanghinaot nga tinud-anay na kini nga pakig-alayon sa ML ngadto kanila alang sa ilang siguredad.

Gipadayag ni Obenza ang iyang kasagmuyo sa ML gumikan sa milabay’ng pagpanulis niadtong Abril 5 ning tuiga daan na silang nagsabot nga mohatag ang kapulisan sa Lapulapu og escort kun adunay magdala og mga alahas apan wala kini tumana sa management.

Nausban kini pipila ka semana na ang nakalabay nga miresulta na usab sa pagkatulis sa minilyong kantidad sa mga alahas human sa pag-abot sa mga opisyales sa ML.

Giklaro hinuon ni Obenza nga kutob lang sa area sa dakbayan sa Lapulapu ang paghatag nila og escort sa ML ug miawhag kanilang makig-alayon sa ubang police units nga agian sa ilang mga kawani nga maghatud sa mga alahas aron mabantayan sila og maayo.  - BANAT NEWS