Dinakpan giingong 'gibun-og' sulod sa karsel sa Cordova

CEBU, Philippines - Midangop ang usa ka pulis sa Cebu Provincial Police Office (CPPO) aron unta makigkita kang Sr. Supt. Patrocinio Comendador kagahapon sa buntag aron iyang pa-imbestigahan ang hepe sa Cordova Police Station ug pipila ka mga sakop niini tungod sa giingong pagbunal-bunal og ‘garote’ og uno por dos nga kahoy ngadto sa iyang bayaw nga napriso sa miaging semana.

Si SPO2 Honorato Inihao kanhi nadestino sa Provincial Investigation and Detective Management Branch (PIDMB) ug karun nadestino sa Investigation and Detective Management Branch (IDMB) sa Lapulapu City Police Office (LCPO) mitug-an sa mga tigbalita nga ang iyang bayaw nga si Nelson Degamo nga taga barangay Alegria, Cordova gipadakop sa iyang asawa sa kapulisan niadtong Huwebes sa miaging semana tungod giingong pagpanghulga niini sa iyang silingan.

Matud ni Inihao nga alcoholic na kaayo og lawas iyang bayaw ug hubog gyud dihang gipadakop sa iyang asawa, apan pagka Sabado sa gabii nanghagis kini (Degamo) sulod sa selda maong giposasan sa mga pulis.

Si Inihao nagkanayon nga pagka Domingo sa buntag iyang nakita ang iyang bayaw nga labihang daghana og bun-og gikan sa bukton, lawas hangtud na sa batiis niini apan giposasan ug gigaid gihapon sa puthaw.

Matud ni Inihao daw nabuang ang iyang bayaw sulod sa prisohan nga unta dili man unta kini ingon niani ang iyang pangisip sa wala pa kini nila gipadakop ug gipasakaan og kasong grave threat.

Pagkasunod adlaw matud pa ni Inihao gipa-medical checkup si Degamo sa Rural Health Officer nga si Dr. Christopher Calimbas ug giresitahan og antibiotic aron sa pagpakalma sa iyang kaugalingon apan wala kini moepekto maong gipalitan niya kini og laing tambal ug didto na mikalma ug nakatulog.

Nagkanayon si Inihao dunay referral letter si Dr. Calimbas nga dad-on sa Vicente Sotto Memorial Medical Center (VSMMC) si Degamo niadtong Lunes aron ipailawom sa psychiatric examination apan hangtud kagahapon wala gyud ipadala ni Cerneo ug wala gyud kini gihimong aksyon.

Niadtong Miyerkules sa dihang miadto siya sa Police Station aron susihon ang iyang bayaw, nagkaabot silang Cerneo apan igo ra siyang gipikpik niini sa iyang abaga ug miingon nga ‘ayaw nalang na’ dayong lakaw kay matud pang Inihao nga namista sa barangay Alegria si Cerneo.

Matud ni Inihao buot niyang ipa-imbestigar sa PIDMB si Cerneo ug ang mga pulis nga ni-duty niadtong Sabado ug Domingo nga iyang gidudahang mibunal-bunal og garote ug kahoy sa iyang bayaw.

“Ako likayan di mahitabo sa lain, parehas gud mi pulis. Niabot na diha dili nato bun-ogon ang dinakpan,” pasabot pang Inihao.

Buot usab karong modangop ni Inihao sa Commission on Human Rights (CHR)-7 aron iyang pa-imbestigahan ang mga pulis pagpamun-og sa iyang bayaw.

Ang Banat News mikontak sa Cordova Police Station atol sa pagkutlo ning balita aron kuhaan unta si Cerneo sa iyang reaksyon apan wala diha sa iyang buhatan.

Si SPO2 Danny Alburo, Desk Officer sa Cordova Police nga nakatubag sa Banat News mipasabot nga dili mahimong dad-on si Degamo sa tambalanan tungod kay walay order gikan sa korte bisan paman kun dunay referral letter ang doktor. Gikumpirmar usab ni Alburo nga ilahang napasakaan og kasong Grave Threat si Degamo niadtong Lunes tungod sa reklamo sa usa ka Ariel      Yaon.

Gihimakak ni Alburo ang pasangil nga gibun-og si Degamo ug ang kahugaw ug baho kaayo sa ilang prisohan nga apil sa gipasangil ni SPO2 Inihao giingong binuhatan ni Degamo nga nagpataka og labay sa iyang hugaw maong nanimaho ang karsel.

Ang duty nga mga pulis niadtong higayona mao ang mga sakop sa Alert Team nga sila si PO3 Rovelio Librado, PO3 Juan Vensi ug PO2 Samson Ygot.(EIM)  (BANATNEWS)