Byron kasuhan gyud sa TCPS

CEBU, Philippines - Gikatakdang pasakaan og kaso sa kapolisan ang kanhi capitol consultant nga si Byron Garcia sumala pa sa officer-in-charge sa Talisay City Police Station Superintendent Eddie Recamara.

Si Recamara nga nahinabi sa Banat News kagahapon nagkanayon nga usa ka representante sa Filinvest ang mianha sa ilang buhatan niadtong Miyerkules nag-follow-up sa reklamo ni Wayne Morris, American national batok kang Garcia.

Kahinumduman nga si Morris residente diha sa Corona Del Mar subdivision sa barangay Pooc, Talisay samtang si Garcia maoy presidente sa homeowner, sa nahisgutang subdivision.

Sa maong bangi si Morris giingong gipakitaan ni Garcia sa iyang AK-47 Rifle aron kini hadlukon hinungdan nga misumbong si Morris sa kapolisan ug kini gitambagan nga adto una modangop sa barangay level.

Kung mahatagan unya og certificate to file action si Morris batok kang Garcia si Recamara nagkanayon posibleng “light threat” ang ilang masang-at batok sa igsuon sa gobernador.

Hinuon laing kaso usab ang ipasaka sa kapolisan tungod sa paghupot niini og armas nga kuwang sa papeles human mapamatud-ing wala kini permit to carry firearm outside of residence (PTCFOR).

Ang maong armas gitahan na ni Garcia sa Firearms and Explosives, Security Agencies and Guards Supervision Section (FESAGSS).

Sa laing bahin, si Dory Emit ang kapitan sa barangay Pooc nga nahinabi sa Banat News kagahapon nagkanayon nga karong Oktubre 10, 2011 sa alas 10:00 sa buntag dunay hearing sa barangay tali ni Morris ug Garcia.

Ang kapitan nagkanayon nga amicable settlement lang ang mahitabo sa maong panag-atubang unya.

Niadtong Septiyembre 20, 2011 si Garcia mipasaka og reklamong “unjust vexation” batok kang Morris diha sa barangay tungod sa giingong pagbuhi sa langyaw og dili maayong mga pulong ngadto kang Garcia.

Niadtong Septiyembre 22, 2011 si Morris mipasaka og kasong “grave threat ug grave coercion” batok kang Garcia diha sa barangay.

Si Garcia kinsa nahinabi kagahapon sa The Freeman ang igsuong pamantalaan sa Banat News nagkanayon nga mihangyo kaniya ang kapitan nga dunganon na lang og husay ang tagsa-tagsa nila ka reklamo sa maong langyaw.

Matud pa ni Garcia nga base sa gibutyag kaniya sa kapitan buot makig-areglo si Morris.

Kabahin sa iyang armas matud ni Garcia nga iyaha kining atubangon. (BANATNEWS)