Dump truck vs Sportage 2 angol

CEBU, Philippines - Duha ang angol dihang nadat-ogan sa 10-wheeler dump truck ang usa ka Kia Sportage   hinungdan sa pagkapusa   sa naulahi   didto sa Cebu South Coastal Road habig sa sitio Salvador, barangay Tangke, dakbayan sa Talisay, kagahapon sa buntag.

Ang mga biktima mao sila si Michael Plice, 68, usa ka langyaw kansang nasyonalidad wala pa hisayri sa pagsuwat ning balita, nagpuyo sa barangay Balerong, dakbayan sa Naga, nga maoy drayber sa Kia Sportage, ug Tata Inocencio, 24, taga barangay Bacayan, dakbayan sa Sugbo, truck boy sa Isuzo dump truck nga nakadat-og sa Sportage. 

Si Plice nabalian sa bukton, samtang si Inocencio samdan sa tiil dihang nasabak kini sa nahagsa nga windshield sa dump truck. Samtang ang suspetsadong drayber nga nagmaneho sa Isuzu dump truck    mao si Jose Sonny Borbon, 44, taga Tawason, dakbayan sa Mandaue.

Si Borbon nga nahinabi sa Banat News kagahapon mibutyag nga gikan sila sa lungsod sa Alcoy nagkarga og anapog paingon ngadto sa barangay Talamban, diin tua magpuyo ang ilang amo nga si Bernardo Santolaja nga maoy hatdan nila sa anapog.

Matud niya nga samtang nagpadagan siya sa iyang sakyanan   pag-abot sa nahitaboan, ang Sportage nga iyang nasundan nag-ikis-ikis og dagan sa karsada ug gituohan nila nga nag-away ang drayber niini ug ang kaubang babaye niini. Unya kalit lamang kining mibabag sa iyang sakyanan hinungdan nga naigo kini sa bumper sa Isuzu, unya nadaro ug dihang wala na makontrolar ni Borbon ang manobela sa iyang de karga,   natumba kini   ug midat-og   ang pangunahang bahin sa Sportage busa   nalata ang atubangan niini nga nag-atubang na sa iyang giagian.

Sila si PO2 Amelito Hornales ug PO1 Mario Cartuciano   mibutyag nga ang pangasaw-onon ni Plice nga si Loudes Amartil, 38, kinsa maoy katupad niini sa front seat sa sportage nangayo og panabang sa mga estambay sa maong dapit aron ikahatod sa tambalanan ang biktimang si Plice.  - BANAT NEWS