Mitulis sa sakop sa PAF priso na

CEBU, Philippines - Nadakpan dayon kagahapon sa kapolisan sa dakbayan sa Mandaue ang mitulis sa usa ka sakop sa Philipine Air Force (PAF) ug sa duha ka kaubang babaye niini sa miaging adlaw didto sa maong dakbayan.

Ang nagkagulkol na karon sa prisohan mao si Kimwel Albo, 25, ulitawo nga taga sitio Mabugat sa barangay Tabok,   sa maong dakbayan.

Nabiktima mao si Rufo Bukog Jr., 29 samtang ang duha niya ka kaubang  babaye mao sila si Jesusa Opan, 30 ug Ann Pucong, 29 nga pulos taga A.S. Fortuna Street sa barangay Banilad.

Si PO3 Cedric Castillo sa kapolisan sa Presinto 4 nga nagbase sa barangay Casuntingan sa maong dakbayan miingon nga ang mga biktima nakuhaan sa ilang mga alahas ug salapi lakip na ang   lap top ug uban pa.

Dugang pa niya nga nagbarog lang ang mga biktima sa daplin sa karsada   dihang kalit lang silang gihunongan sa usa ka motorsiklo nga gisakyanan sa duha ka tawo diin usa niini mao si Albo.

Unya si Albo maoy nanaog sa motor ug mition sa iyang armas de fuego ngadto sa mga biktima uban sa pagdeklarar nga tulis.

Human makuha ang mga butang misirit dayon ang mga tulisan ug mipahilayo sa maong luagr.

Ang mga biktima walay nahimo gawas sa pagtaho ngadto sa kapolisan sa Presinto 4 ug dihang ilang gipatan-aw sa mga hulagway sa mga grupo sa mga tulisan nga natala sa ilang buhatan ilang nakita ang dagway sa suspetsado nga si Kimwel Albo.

Matud pa ni PO3 Castillo nga gipaatubang nila sa mga biktima ang suspetsado sa paghidangat sa ilang buhatan sa wala pa ipaslak sa bilanggoan. (BANATNEWS)