Konsehal Loon sa Poro mitaliwan na

CEBU, Philippines - Si kanhi konsehal   Alexon G. Loon sa lungsod sa Poro namatay sa sakit nga leukemia kaniadtong Septiyembre 14 didto sa ilang balay sa Poro, isla sa Camotes sa alas 4:00 sa kaadlawon sa edad nga 60 anyos.

Si Loon naminyo kang Jerasol Gonzales Loon diin gitugahan sila'g duha ka anak---si Aljon ug Benja ug adunay usa ka apo nga babaye.

Aduna sab siya'y duha ka igsoong lalaki nga sila si Noel ug Bernard Ray ug bugtong igsoong babaye nga si Beverlita Loon Young ug adunay daghang mga pag-umangkon ug mga ig-agaw.

Si Noel ug iyang asawa nga si Josefa, gikatakdang mopauli sa madaling panahon gikan sa Toronto, Canada ug ang iyang duha ka igsoon nga sila si Bernard Ray ug Beverlita tua manimuyo sa Poro.

Si Beverlita usa ka barangay konsehal sa Poblacion, Poro ug si Bernard Ray principal sa usa ka public school.

Napiling konsehal sa lungsod sa Poro si Loon ubos sa administrayon ni kanhi presidente Corazon C. Aquino ug nagsilbing konsehal ubos ni kanhi Mayor Moises G. Otadoy kinsa maoy labing dugay nga nagsilbing mayor sa kasaysayan sa maong lungsod nga mikabat og labing menos 16 ka tuig.   

Sa miaging piniliay kaniadtong Mayo, nagpapili og usab si Loon isip konsehal apan napilde.

Ilubong si Loon sa Septiyembre 24 didto sa Poro Catholic Cemetery.

Laing mga ig-agaw ug pang-umangkon ni Loon nga gikan sa Seattle, Washington ug sa Hongkong ang gikatakda usab nga mo-uli didto sa Poro alang sa iyang lubong. (BANAT NEWS)