Gipunting susama og langgam

ORMOC CITY, Philippines  -- Patay ang usa ka 28-anyos nga sakop sa Civilian Auxiliary Forces Geographical Unit (CAFGU) human kini giunay pagpatay sa iyang igsuon niadtong Biyernes sa buntag diha sa barangay Cabintan sa bukirong barangay sa Ormoc.

Ang biktima giilang si Cristopher Albarido gipunting nga susama og langgam ibabaw sa lubi nga iyahang gisanggotan.

Si Senior Insp. Shevert Alvin Machete, Police Station 1 chief, mitug-an sa The Freeman/Banat News nga ang biktima naigo sa likod ug natagak gikan sa tumoy ngadto na sa ubos.

Ang suspek nga si Pepito Albarido migamit og pugakhang gibana-banang 10 ka metros gikan sa mga kasagingan ug kamoteng-kahoy.

“He concealed behind cassava and banana plants but cleared the leaves so he had a clear view of the victim,” matud pa ni Machete.

Ang 26-anyos nga kapuyo sa biktima mibutyag sa kapolisan nga mibiya ang biktima aron manglimpyo sa sanggotan sa maong lugar.

 Matud pa niini nga pipila ka adlaw sa wala pa mahitabo ang pagpamusil gipasidan-an na siya sa mga barangay tanod nga dili biyaang nag-inusara ang biktima tungod kay adunay nagplanong kini patyon.

 “Gibiyaan na sa akong bana ang ubang sanggotan nga layo-layo sa balay agig paglikay, kadto ra sad nga higayon nga wa ko modungan niya kay nag-andam usa ko sa pamahaw sa among duha ka anak edad 5 ug 3 anyos,” matud pa sa kapuyo ni Albarido.

Ang imbestigador sa kaso nga si SPO2 Leo Enalisan nagtuong may kalambigitan sa kabiling kayutaan sa mga ginikanan sa duha ang hinungdan sa maong pagpatay sanglit aduna nay mga kagubot tali kanila nga nahitabo tungod niini.

Ang labing uwahing gikabiklan sa magsuon mao ang hose sa tubig.

“Gisukmatan sa akong bana si Atok (Renato) kun ngano iya gihipos ang hose nga sa ila man to inahan, lisod na hinoon pagkabo sa tubig kay tua na ubos sa bakilid. Dinhi sila nagkalalis nga miresulta sa paglakaw ni Atok bitbit ang iya shotgun,” matud pa sa babaye.

Matud pa sukad sa maong panaglalis wala nay nakakita sa suspek sulod sa pipila ka adlaw apan atol sa pagkahitabo adunay nakakita sa suspek nga miikyas. Sumala pa nga si Renato hanas mamusil og idlas nga unggoy ug baboy ihalas sa bukid gamit ang iyang pugakhang.(EIM) (BANATNEWS)