Gullas napiling miyembro sa CA

CEBU, Philippines - Si Kongresista Eduardo Gullas sa unang distrito sa lalawigan sa Sugbo napiling miyembro sa bicameral Commission on Appointments niadtong Agosto 24, 2011.

Si Gullas maoy mipuli kang Iloilo City fourth district representative nga si Ferjenel Biron.

Ang representante sa unang distrito ning lalawigan maoy kanhi Vice Chairman sa CA sa 14th Congress.

Sa laing bahin, siya usab ang   gilauman nga mahimong guest speaker sa pagsaulog sa charter day sa dakbayan sa Naga karong adlawa.

Kahinumdoman nga si Gullas maoy nangamahan sa House Bill nga nagpahimo sa Naga nga siyudad niadtong tuig 2007.

Ang maong kongresista usab ang nag-una sa pagpakigbisog ngadto sa Korte Suprema batok sa nullification sa charter siyudad.

Human sa taas nga panahon niyang pakigbisog, niadtong buwan sa Hunyo niining tuiga ang Korte Suprema mi-usab sa lagda niini sa pagpabalik, sa pagkadakbayan sa   16 ka lungsod nga nadakbayan na apan gipabalik sa pagka-lungsod   sa mga mireklamong mga magbabalaod sa nasud.  - BANAT NEWS