Chiong mo-deliver sa SONA karon

CEBU, Philippines - Andam na ang tanan alang sa pagbatbat ni Mayor Valdemar Chiong sa iyang State of Naga Address (SONA) atol sa kasaulogan sa ika-4th Charter Day sa siyudad karong adlawa Septiyembre 5, 2011.

Ang kasaulogan sa charter day buksan pinaagi sa usa ka misa pasalamat sa alas 8:00 sa buntag sa Naga Parish.

Si Chiong kinsa gitakdang hatagan sa mga kawani sa city hall og plaque of appreciation mopahigayon sa iyang SONA sa alas 9:30 sa buntag diin isaysay niya ang bahin sa mga kalamboan sa siyudad ubos sa iyang pagdumala.

Si Gobernador Gwendolyn Garcia ug Kongresista Eduardo Gullas sa unang distrito sa lalawigan sa Sugbo kinsa moluwat og inspirational message sa pagbukas sa programa, hatagan usab og plaque of appreciation sa siyudad.

Ang ubang mga kalihokan maglakip sa mass wedding nga ipahigayon sa Naga Parish, inter-school quiz bee nga himoon gikan sa alas 9:00 sa buntag hangtud sa alas 5:00 sa hapon sa city hall uban niini ang employees appreciation day ug sa alas 5:00 sa hapon magsugod ang culmination program sa Ocean Park Community Stage.

Ang ubang kalihokan nga may labot sa   charter day celebration mao ang gipahigayong Local Government Unit (LGU) Short Dance Parade, libre late registration sa birth, libreng medical ug dental mission sa miaging Septiyembre 1, 2011 uban ang pagbukas usab sa LGU employee sports fest.

Niadtong Septiyembre 2, 2011 adunay job fair sa city hall ug padayon sa libre nga late registration sa birth.

Pagka-Septiyembre 3, 2011 gibuksan ang Agro-Industrial Fair ug adunay modern dance competition ug bingo social.

Kagahapon gipahigayon ang fun run, nga gisalmotan sa mga senior citizen ug Person with Disability (PWD) ug may choral contest usab sa mga piniling tunghaan sa sekondarya.  - BANAT NEWS