Re-blocking sa carreta ipadali

CEBU, Philippines - Gimando ni Mayor Michael Rama kagahapon ang pagpadali sa gipatumang re-blocking sa pipila ka lugar sa barangay Carreta nga naigo sa sunog duha na ka semana ang milabay.

Kini maoy gibutyag ni Rama human siya giawhag sa konseho nga paspasan gyud ang re-blocking aron makabalik na og puyo sa ilang mga lugar ang mga biktima sa sunog.

Saysay sa mayor nga gilihok na kini karon sa Dept. for the Welfare of Urban Poor (DWUP) ug iya usab nga gihangyo si Konsehal Alvin Dizon nga maoy tsirman sa Committee on Housing sa konseho nga motabang usab sa ilang operasyon.

Nasayran nga naghuot na ang 100 kapin ka pamilya sa mga evacuation site ug gusto nang makabalik sa ilang puwesto busa nanghinaut sila nga mapaspasan ang re-blocking. Naandan na ni Rama nga matag dunay sunog, kinahanglan nga kompletohon una ang re-blocking aron makasugod na og tukod og balay ang mga biktima sa sunog ug sa mao usab nga higayon sila makadawat og housing materials.

Sumala pa sa mayor nga angayan gyud nga mag-re-blocking aron mahatagan og higayon nga mabutangan og igong dalan ang ilang dapit ug dili na unya maglisod pagsulod ang mga sakyanan sa higayon nga dunay mahitabo nga emerhensya sama sa sunog.

Ang kadungan og kasunog sa Carreta nga tulo ka sitio sa Tejero nasugdan na og re-blocking, tuyo sa dakbayan ang mabutangan og mga dalan ang duha ka barangay tunga-tunga sa kabalayan.   - (BANAT NEWS)