Pro-7 andam vs NPA attacks

CEBU, Philippines - Gipaniguro sa rehiyonal nga buhatan sa kapolisan nga dili mahitabo sa ilang ginsakupan ang nahitabong sunod-sunod nga pagpangatake sa mga rebeldeng New People’s Army sa ilang mga police stations.

Dili palang dugay, ang labing uwahing giatake sa mga NPA mao ang usa ka police station sa probinsya sa Masbate . Kini human sa sunod-sunod usab nga pagpangatake didto sa Mindanao sa susamang grupo.

Si PRO-7 Director Ager Ontog mipasalig sa publiko nga ang tanang police station sa rehiyon “fully-equipped” ug aduna kini igong mga tawo nga makaresponde sa susamang mga sitwasyon.

“Lahat nang police stations are either 21 or above na ang mga policemen just in case may ganyang pangyayari (pag-atake),” pasabot pa ni Ontog. Matud pa ni Ontog nga gawas sa pagbutang og saktong gidaghanon sa kapolisan sa matag police station kompleto usab sila og mga gamit.

Midugang si Ontog nga ang Negros Oriental lang ang probinsya sa iyang ginsakupang adunay naglihok nga NPA apan kining maong probinsya ang adunay labing daghan og polis.

Butyag usab ni Ontog nga bisan paman og walay aktwal nga mga pagpanghulga ila gihapon kini nga gipangandaman.

Kahinumduman nga ang probinsya sa Masbate gi-atake sa mga grupo sa rebelde sa miaging semana diin nakaangol kini og tulo ka polis atol sa pagpangatake. (BANATNEWS)