Suspek sa basag kotse nadakpan

CEBU, Philippines - Nadakpan na sa kapolisan ang gipasanginlang responsable sa mga nagsunod nga mga insidente sa pagpamuak og bintana ug pagkawat sa mga sulod sa awto dinhi sa Sugbu nga gitawag og Basag Kotse Gang.

Si Sr. Supt. Patrocinio Comendador, director sa Cebu Provincial Police Office (CPPO) mitumbok kang Jules Gumban, nga taga barangay Banilad sa dakbayan sa Sugbu human nadakpan ni Chief Insp. George Ylanan sa Provincial Investigation and Detective Management Branch (PIDMB).

Si Gumban nasikop niadtong Sabado sa gabii diha sa Pino Restaurant, Edison St., sa barangay Lahug base sa Warrant of Arrest (WOA) nga giisyu ni Judge Wilfredo Navarro sa Regional Trial Court (RTC) branch 53 niadtong Hunyo 30, 2011 nga ‘Basag Kotse Gang incident’ nga nahitabo sa parkingan sa Robinson diha sa dakbayan sa Talisay. Nakuha sa kapulisan ang mga ebidensya ang usa ka plastic pack nga gituohang may sulod nga shabu, improvised tooter, spark plug component, martilyo, lighter, tube container ug usa ka Mitsubishi nga awtong kolor gray nagtangag sa plakang GEE-707.

Sigun sa taho sa kapulisan ang suspek nasigpatan sa dakbayan sa Mandaue niadtong Biyernes sa gabii apan kalit lang nahanaw hangtud nga ang impormante sa kapulisan mipahibawo niadtong Sabado nga nasigpatan kini diha sa barangay Lahug.

Si Comendador sa pakighinabi sa mga tigbalita nagkanayon nga daghan na kaayong mga insidente sa ‘basag kotse’ ang anaa sa ilang listahan apan napulo ra ang giangkon ni Gumban nga siya maoy responsable niini.

Gipakita ni Comendador ang listahan nga diin dunay mga sakyanan nga nabiktima ni Gumban nga diha sa Club Ultima, Cyber gate, Chung Hua Hospital, Holiday Spa, Caesar’s Palace, I.T Park, Archbishop Palace ug uban pa.

Matud ni Comendador nga mas daghan ang nabiktima sa dakbayan sa Mandaue nga miabot og dili mominus 20 ka buok ang nabiktima niini.

“Naay kauban (Gumban) subject na sa Mandaue ang pag follow-up niini, kining grupoha way klaro kinsay lider nila kay mismo si Gumban mohimo man siya niini,” nagkanayon si Comendador.

Gisubay na usab nila Ylanan ang mga dapit diin gi-prenda ni Gumban ang Glock 40 nga kalibre sa armas nga gipanag-iya sa mayor didto sa Leyte nga gibiktima ni Gumban niadtong tuig 2009 nga gibilin diha sa Capitol Parish Church sa barangay Camputhaw. (EIM) (BANATNEWS)