Furniture shop naugdaw sa sunog

CEBU, Philippines - Usa ka sunog nga nahitabo didto sa barangay Yati, lungsod sa Liloan miugdaw sa usa ka tindahan sa mga muwebles sa miaging gabii. Si FO2 Dinato Yongco, imbestigador sa kabomberohan sa maong lungsod mibutyag nga ang pabrika nga naugdaw gipanag-iya ni Melvin Montellano.

Gawas sa pabrika, naugdaw usab og apil ang balay ni Montellano. Matud pa ni FO2 Yongco nga si SFO4 Allan Arciaga nga maoy care taker sa ilang buhatan samtang nag-leave pa ang ilang municipal fire marshall, mipaubos sa maong sunog sa second alarm.

Dugang pa ni FO2 Yongco nga dili pa nila matataw kun diin magsugod ang kayo nga dali kaayong mikaylap sa kinatihuk-an sa pabrika nga maoy nakaingon sa hingpit nga pagkaugdaw niini.

 Si Montellano, ang tag-iya sa maong pabrika adunay pagtuo nga posible usa sa iyang trabahante naglabay og upos sa sigarilyo ngadto sa naglaundok nga ginabas ug dihang misilaob na ang   kayo kusog kaayo kining mikaylap.

Si FO2 Yongco miingon nga sa pasiuna nilang pagbanabana sa gibilin nga danyos sa maong sunog nagkantidad og P300,000 kapin apan mahimo pang modako ang maong kantidad sa higayon nga mahingpit sa tag-iya ang pagkuwentada sa kantidad sa mga naugdaw nga kahimanan ug mga finish product nga gipangaon sa tag-iya sa barko.

Hinuon si FO2 Yongco miingon nga atol sa maong sunog, walay naangol o nakalas ug ang kabomberohan sa Consolacion ug Emergency Rescue Unit Foundation (ERUF) maoy ilang kaabag sa pagpawong sa kayo. - (BANAT NEWS)