Drayber sa habal-habal giluba sa kompetensiya

CEBU, Philippines - Talandugon ang kahimtang sa usa ka drayber sa habal-habal dihang gidunggab kini sa kompetensiya niining drayber usab og habal-habal didto sa garahean sa Mitsumi sa barangay Sabang, siyudad sa Danao kagahapon sa alas 4:30 sa kaadlawon.

Ang biktima nga nakaangkon og duha ka samad dinunggaban mao si Irvin Villacis, 24-anyos, minyo, molupyo sa nahisgutang lugar.

Ang suspek mao si Roland Caneda, 30, minyo nagpuyo usab sa nahisgutang lugar.

Matud ni SPO2 Ildefonso Prosia sa Danao City Police dihang nahinabi sa Banat News nga ang biktima didto sa parking lot sa Mitsumi niadtong higayona aron unta pagkuha sa iyang asawa nga si Marcela Villacis nga nagtrabaho sa maong factory.

Gibutyag ni Marcela sa kapolisan nga samtang paingon na unta siyang mosakay sa motorsiklo sa iyang bana kalit nga niabot si Caneda ug sa way daghang pangutana niduol kini ug dayon gidunggab ang biktima duha ka higayun.

Si Villacis nakaangkon og samad dinunggaban sa buko-buko ug sa kilid nga bahin sa tiyan niini daling gidala ngadto sa Danao City District Hospital apan tungod sa iyang kahimtang gibalhin kini sa Vicente Sotto Memorial Medical Center.

Si Caneda misuway unta kini sa pagsibat apan nasignit kini sa mga polis nga miresponde sa maong insidente.

Ang suspetsado nagtingkagol sa karsel sa Danao Police Station ug gikatakdang pasakaan og tukmang kaso sa kalapasan nga iyang nahimo.

Ang kapolisan sa siyudad natahap nga panagribal sa pasahero o personal nga away ang hinungdan sa maong pagpanunggab sa suspetsado ngadto sa biktima. (BDB)  (BANAT NEWS)