Ulo nangapantok 2 patay

CEBU, Philippines - Usa ka batang 12 anyos ug lola nga 80 anyos pulos nakabsan sa kinabuhi human sila madasmagi sa mga sakyanang de motor sa managlahing lugar ning lalawigan kagahapon sa buntag.

Ang nakalas mao si Ericson Sioson, 12, nga taga dalan C, Padilla sa barangay Duljo, dakbayan sa Sugbo, ug Trinidad Mahilum, 80 nga taga sitio Loray I, barangay Poblacion, dakbayan sa Toledo.

Si Sioson giingong nabuak ang bagolbagol human kini maligsi sa usa ka jeep nga pasaheroan didto sa dalan C. Padilla.

Ang drayber sa PUJ nga nakaligis sa biktima giila nga si Robert Gimena, 30, nga taga barangay Inayawan, dakbayan sa Sugbo.

Samtang si Mahilum nasugamak usab sa pagkadaot sa ulo human madasmagi sa motorsiklo nga gimaneho ni Wilfredo Cabiles, 56, nga taga barangay Magdugo, dakbayan sa Toledo.

Sumala kang SPO1 Dionesio Galo sa Cebu City Traffic Division nga si Sioson kalit lang milabang sa karsada nga wala magpakabana   sa sakyanang gimaneho ni Gimena nga nagpaingon sa dakbayan sa Sugbo gikan sa habagatan niadtong tungora.

Midugang si SPO1 Galo nga wala gayud makabantay si Gimena sa paglabang ni Sioson sa karsada tungod kalit lamang kining miguho gikan sa usa ka sakyanan nga nag-parking sa daplin sa karsada unya mikabad og labang sa karsada hinungdan nga wala na niya kapugngi sa preno ang iyang sakyanan.

Napasok sa ilawom sa sakyanan ang biktima ug nagupok ang ulo niini human malatayi sa mga ligid.

Samtang si Mahilum giingong nagpas-an og sako nga gisudlan sa iyang mga senina nga naglakaw sa karsada dihang nasaghiran kini sa habal-habal nga gimaneho ni Cabiles nga nagbaguros paingon sa terminal sa Poblacion, Toledo, gikan sa Magdugo niadtong Biyernes sa gabii.

Sa asoy ni Cabiles sa kapolisan gibutyag niini nga kalit kaayo ang paglabang ni Mahilum busa wala kini niya mabantayi.

Apan gumikan sa kakalit naglisod na si Cabiles sa pagpugong sa    dagan sa iyang motor hinungdan nga nasaghiran gyud ang biktima busa nalamba kini ug napantok ang ulo sa sementadong karsada.

Gihatod dayon ngadto sa Toledo Disrict Hospital ang biktima ug didto matud pa ni Moises Trinidad, 32, nga anak ni Mahilum nga gimandoan lang kuno sila sa doktor sa maong tambalanan nga ang biktima paimnon lang og tambal ug pabugnawan og ice ang ilong niini apan wala hilnga ang iyang ulo.

Apan kagahapon sa kaadlawon nabugtoan kini sa kinabuhi gumikan sa kadaot nga naangkon sa iyang ulo.

Kay base sa resulta sa autopsy, maayong pagkadaot sa utok niini gumikan sa pagkapantok sa ulo sa sementadong karsada.

Ang duha ka mga suspetsadong drayber pulos na nagtingkagol sa prisohan ug nagpaabot sa tukmang kaso nga isang-at batok kanila. (WC) (BANAT NEWS)