Brownout naggumikan sa tawong nahagbong

CEBU, Philippines - Usa ka construction worker kinsa nahagbong sa damba nga iyang gipatungan ug nasangit sa main line sa kuryente sa dalan Tupaz, barangay Pasil, dakbayan sa Sugbo maoy hinungdan sa kalit nga pagkapawong sa kuryente kagahapon sa alas 2:56 sa hapon. Si SPO4 Reynaldo Origines sa San Nicolas Police Station miila sa biktima nga si Rudy Estrera, 50, nga nagtrabaho sa Grace’s Apartment sa Tupaz.

Si Ethel Natera, tigpamaba sa VECO nagkanayon nga ang linya sa kuryente nga naputol may 69 kilo volt nga maoy nag-supply sa mga lugar sa uptown, downtown, ug midtown nga naglakip sa mga dapit sa Mango Avenue, Mabolo, Fuente Osmeña ug B. Rodriguez.

Sumala ni Natera nga nabali ang scaffolding nga gipatungan ni Estrera hinungdan sa paghagsa niini sa yuta.

Gihatod dayon si Estrera ngadto sa Cebu City Medical Center diin siya patambali. (BANAT NEWS)