Polis nagmaoy mipasalba sa armas

CEBU, Philippines - Usa ka pulis nga gipasanginlang nagmaoy tungod sa kahubog ug misulong sa balay sa iyang silingan ug nagpasalba sa iyang armas ang gireklamo sa mga silingan diha sa barangay Talamban siyudad sa Sugbu.

Ang pulis giingong nangayo na hinuon og pasaylo sa iyang silingan human nahuwasan sa iyang kahubog apan gi-refer na sila ngadto sa Internal Affairs Service (IAS) sa Cebu City Police Office (CCPO). Ang gireklamo nga pulis mao si PO2 Samuel Montuerto, nagpuyo sa Talamban ug nadestino sa Police Regional Office-7.

Ang biktima giilang si Robert Layola, 38, ug silingan sa suspetsado. Si Emely, inahan sa biktima misaysay sa The Freeman igsuong mantalaan sa Banat News nga naghatud ang iyang anak sa ilang mga bisita sakay sa motorsiklo ug nalabyan ang grupo sa mga lalaki nga nag-inom apil na si Montuerto.

Gipahunong ni Montuerto ang gisakyang motorsiklo sa biktima ug gipugos sa pagpainom.

Mibalibad si Robert nga dili una siya moinom kay iyang ihatud una ang iyang mga bisita paingon sa eskina apan nasuko ang pulis ug giharas ug gibira ang biktima hinungdan nga natumba hinuon sila sa motorsiklo mao nga nagubot na hinuon.

Matud sa inahan nga iyahang gitambagan ang iyang anak nga modagan nalang ug mouli ngadto sa pikas nilang balay nga nahimutang sa barangay Pit-os.

Apan pagkaala-una pasado sa kaadlawon ang pulis wala gihapon mahuwasi sa kahubog giingong miadto sa balay sa biktima ug nagpasalba katulo ka higayon sa dala niining armas.

“Ayaw pakita nako (biktima) sulod sa duha ka oras kay di tika paabton duha ka adlaw,” asoy pang Emely nga nikutlo sa gisulti sa maong pulis. Tungod sa kahadlok, ang laing igsuon sa biktima nga si Joan Castillo daling nanawag sa kapulisan aron marespondihan ug mahipos ang hubog nga pulis.

Human gi-blotter sa kapulisan sa Talamban ang maong hitabo, gi-refer sila sa Internal Affairs Service (IAS) sa Cebu City Police Office (CCPO). Apan kagahapon sa dihang nahuwasan na sa kahubog ang pulis giingong miadto sa balay sa biktima ug nangayo’g pasaylo sa iyang nabuhat. Gihulagway nga maayong tawo ang maong pulis apan kadto rang higayona nga nalabihan sa kahubog.  - BANAT NEWS