CIDG nagdudang moikyas si Santos

CEBU, Philippines -  Nagbalik-balik lang. Kini maoy pamahayag sa Criminal Investigation and Detective Group (CIDG) kabahin sa gisang-at nga Motion for Reconsideration sa kampo sa suspek sa kidnapping with homicide nga si Bella Ruby Santos ug sa British national niini nga uyab nga si Ian Charles Griffiths.

Si Inocencio dela Cerna, ang abogado sa CIDG-7 nagkanayon nga ang gisang-at nga mosyon sa pikas kampo natuki na sa nanglabay’ng argumento.

“The arguments in the alleged Motion for Reconsideration are substantially a rehash and repetition of the arguments alleged in respondent’s counter-affidavit,” matud pa sa pamahayag pagsupak sa CIDG.

Ang CIDG uban sa amahan sa biktimang si Ellah Joy Pique maoy mipasaka sa kasong kidnapping with homicide ngadto sa Provincial Prosecutor’s Office. 

Nanghinaot ang CIDG nga paboran ang ilang pagsupak sa maong mosyon ug dalion na ang pagsang-at sa kaso ngadto na sa korte tungod dako nilang pagtuong dunay indikasyong moikyas ang usa sa mga suspek nga si Santos .

Kini tungod sa nadawat nilang report nga gibaligya ug nahalin na ang balay ug sakyanan ni Santos sa Barangay Inayagan, Naga City.

Giawhag karon sa CIDG diha sa ilang oposisyon nga ibasura na ang gisang-at nga motion for reconsideration nila Santos ug Griffiths tungod kay wala naman sila’y bag-ong gisang-at nga ebidensya.

Sa sayo pa ang kampo sa mga suspetsado pinaagi sa ilang abogadong si Rameses Villagonzalo misang-at og 18-pahinang motion for reconsideration tungod sa tulo ka mga rason. Sumala pa sa mosyon nga wala mahatagi og due process si Griffiths sanglit wala kini mapadad-i og subpoena sa gipuy-an niini sa Britanya, ikaduha mao nga kadudahan ang kredibilidad sa mga testigos ug ang ikatulo mao ang kapakyas sa kapolisan sa pagpresentar sa resulta sa DNA test nga gihulagway nilang usa ka matang sa pagpugong sa ebidensya.

Ang three-man panel nga gilangkoban nila ni prosecutor Jose Edwin Renegado, Anabelle Robles ug Maria Luisa Ong nakakita og ‘probable cause’ aron masang-at ngadto sa korte ang kaso batok sa mga suspek.

Sumala pa nila nga ang positibong pag-ila sa mga testigos ngadto sa suspek dili matuis ug dili kadudahan. (BANAT NEWS)