Hepe nabalaka tungod sa hulga

CEBU, Philippines - Nabalaka karon ang hepe sa Argao Police Station nga si Inspector Allan Batobalonos sa seguridad sa iyang pamilya tungod sa nadawat nga pagpanghulga kaniya pinaagi sa text nga iyang gidudahang gikan sa kampo sa giingong big time pusher nga ilang nadakpan ug nakasuhan nga taga barangay Talaga sa nahisgutang lungsod.

Si Batobalonos natahap nga ang maong pagpanghulga gikan sa giingong amo ni Allan “Edgar” Tapayan kinsa usa ka suspetsadong pusher og ginadiling drugas.

Si Tapayan giingong level 2 drug pusher ug nasikop sa gipahigayong buy-bust operation sa kapolisan niadtong Hunyo 11, 2011 nga diin nakuhaan kini og lima ka mga gagmay’ng paketeng shabu.

Si Batobalonos nakadawat og mensahe sa text sa milabay’ng semana nga nagkanayon “grabeha nimo sir oi gidakop man nimo akong paryente, gi-section 5 man nimo. Bawos-bawos lang unta ta patagua lang imong pamilya kay kadumdum mi sa inyo.”

Si Batobalonos nagkanayon nga duna siya’y gidudahan nga nagpadala sa maong mensahe apan kinahanglan pa niyang makompirmar sanglit posibleng kauban ra niya kini sa buhat.

“Wa may naglagot nako nga politician but somebody said 20 percent nga polis, pero i-confirm una nako,” dugang pa sa hepe.

Giingong sa milabay’ng semana human nga si Tapayan nasikop dunay mga nanawag nga wala magpaila diha sa police station ug misuway sa pagsuborno sa hepe sa pagtanyag og P300 mil ug gipatas-an pa ngadto sa P500 mil bugti sa pagbuhi ni Tapayan apan ang maong tanyag gibalibaran ni Batobalonos.

“Suko sila nga gi-file na ang kaso. Maayo lang unta’g ako pero pamilya man gipuntarya,” ni Batobalonos pa.

Gibutyag sa hepe nga ang tibuok lugar sa habagatan (south) si Tapayan ang giingong naghupot sa pagpamaligya og ginadiling drugas.

Giangkon ni Batobalonos nga naglisod sila sa pagsikop ni Tapayan tungod kay daghan kining matagoan diha sa nagkalain-laing lungsod.

Si Tapayan giingong kanunay’ng tambagan sa bayaw niini nga polis sa paghunong na sa ilegal nga buhat niini apan dili kini mamati sa mga tambag.

Si Senior Superintendent Patrocinio Comendador, hepe sa Cebu Provincial Police Office nagkanayon nga miluwat na siya og direktiba kang Batobalonos nga mopahigayon og imbestigasyon sa maong pagpanghulga ubos sa pagtabang sa mga imbestigador sa CPPO.

Si Comendador mibahad ngadto sa mga nanghulga nga gukdon gyud nila ang mga operasyon sa mga ilegal nga drugas. (BANAT NEWS)