2 ka balay ugdaw sa sunog

CEBU, Philippines - Mikabat sa P120,000 ang danyos sa sunog nga miugdaw sa duha ka balay didto sa sitio Datag sa barangay Maribago sa dakbayan sa Lapulapu sa miaging gabii.

Ang nasunog mao ang balay nga gipuy-an sa tulo ka pamilya nga naglakip kanila ni Constancio Sagarino, Romeo Bronuela ug Isbo Sagarino.

Si FO1 Norman Alivio sa Bureau of Fire Protection (BFP) sa maong dakbayan nga nahinabi sa Banat News miingon nga nagsugod ang kayo sa balay ni Constancio ug mitapon kini ngadto sa laing balay nga gipuy-an sa laing duha ka pamilya.

Matud pa ni FO1 Alivio nga sa imbestigasyon nga ilang gihimo ilang nasuta nga ang naghinubrang paggamit sa kuryente maoy hinungdan sa kalit nga pag-ulbo sa kayo.

Gitataw niya nga ilang gipaubos sa 2nd alarm ang maong sunog nga maoy hinungdan sa pagpadagan sa tanan nilang fire truck nga nagtinabangay og pawong niini hinungdan nga milanat lang og 3 minutos hingpit nang na-kontrolar nila ang maong sunog.

Si FO1 Alivio miingon nga atol sa maong sunog walay naangol o nakalas nga kinabuhi.  (BANAT NEWS)