17-anyos napusilan sa polis

CEBU, Philippines - Usa ka polis nga nadestino sa Tuburan Police Station ang mag-atubang og kaso human giingong aksidenteng nakapusil og menor de edad nga mananagat niadtong Huwebes sa gabii diha sa kadagatan sa lungsod sa Tuburan.

Ang maong insidente nahitabo dihang gisikop sa kapolisan ang duha ka mga pumpboat sa mga gisuspetsahang ilegal nga mananagat.

Ang hepe sa Cebu Provincial Police Office (CPPO), Patrocinio Comendador nagkanayon nga ang hepe sa Tuburan Police Station nga si Inspector Wilfer Grapa ang mopahigayon og imbestigasyon sa maong hitabo.

“If found liable he will be charged accordingly however, we’ll also consider that was a legitimate operation,” matud ni Comendador.

Ang 17-anyos nga taga barangay Anapog, lungsod sa San Remegio nakaangkon og usa ka samad pinusilan sa tuong paa human si PO2 Alison Esmero mipusil sa likod nga bahin sa pumpboat aron unta kini pahunongon.

Ang 17-anyos naa na karon sa Vicente Sotto Memorial Medical Center giingong usa sa siyam ka mga ilegal nga mananagat.

Ang mga mananagat nga kuyog niini mao ang laing 17-anyos nga taga barangay Putat, lungsod sa Tuburan; Solo Paglinawan, 31; Leo Paglinawan, 30; ug Manolo Ramos, 30, parehong mga taga barangay Poblacion, Tabuelan; Vicente Noval, 38; RJ Godez, 27; Diosdado Torrejos, 49; ug Trispono Palacio, 47, mga taga barangay Anapog, San Remegio.

Si PO2 Ariel Maravillas sa Tuburan Police Station nagkanayon nga ang mga ilegal nga mananagat sakay sa duha ka mga pumpboats nga migamit og compressor sa ilang pagpanagat diha sa kalawran sa Tuburan dihang nasigpatan sa mga polis.

Si Esmero uban kang PO2 Pablo Arnoco ug sa tulo ka mga fish warden nga sila si Rodolfo Labunga, Vicente Amahan ug Michael Peligro nagpatrolya niadtong higayona.

Apan imbes nga mohunong mipadagan hinuon sa ilang mga pumpboat paingon sa lawod aron moikyas paingon sa lungsod sa Tabuelan hinungdan nga miradyo ang mga polis sa kapolisan sa maong lungsod aron masikop ang mga suspetsado.

Si Esmero mibutyag nga 20-minutos ang ilang ginukdanay sa lawod una pa siya midesider nga pabuthan kini og usa ka warning shot gamit sa iyang M16 rifle nga service firearm.

Apan bisan pa niini wala gihapon mahunong ang maong mga mananagat hinungdan nga mipabuto siya pag-usab tumong ngadto sa pump boat aron mabuslot ug malunod.

Tungod sa pagkabuslot sa ilang pumpboats diha pa mohunong ang mga suspek, apan diha nalang nila mahibaw-ing naigo diay ang usa sa mga batan-ong mananagat.

Naembargo sa mga polis gikan sa maong mga mananagat ang usa ka unit nga pumpboat, usa ka compressor machine, usa ka tanke sa compressor, 40 metros nga hose, lima ka pana, tulo ka mga bugsay ug 12 ka kilong mga isda nga nagkantidad tanan og P1,500.

Ang mga nasikop natingkagol karon sa Tabuelan Police Station detention cell. (EIM) (BANAT NEWS)