Naanod sa su'g nalumos

CEBU, Philippines -  Patay ang usa ka bayong-bayong nga nalumos samtang naligo sa kadagatan sa sitio Kanipaan, barangay Pooc, dakbayan sa Talisay niadtong Biyernes sa hapon.

Ang biktima mao si Arnold Abella, 16-taga sitio Pinggan, barangay Pakigne, lungsod sa Minglanilla.

Si Abella may mga kaubang naligo nga mao sila si Jerome Deiparine, 16, Joshua Deiparine, 13, Mark Vincent Deiparine, 17, Dester Dabato, 14, Ariel Genilza, 17, Alber Genilza, 14, Alex Morilla, 13, Ercil Torrefiel, 15, Eric Torrefiel (wala hisayri ang edad) ug ang 18-anyos nga nailhan lang sa ngalang “Dalandan, tanan taga sitio Pinggan.

Base sa imbestigasyon sa kapolisan nasayran nga ang maong mga batan-on miabot sa lugar sa ala una sa hapon sa maong adlaw ug si Ercil ug Abella milangoy sa 150 metros nga gilay-on gikan sa baybayon.

Nianang pagka- ala 1:20 sa hapon ,samtang naglangoy-langoy si Abella giingong naanod kini sa kusog nga sulog sa dagat paingon ngadto sa ilawom.

Si Ercil kinsa dili makamaong molangoy daling mibalik sa baybayon ug nangayo og panabang kang Eric.

Si Eric daling milangoy aron luwason si Abella apan nabuhian niya kini tungod sa kakusog sa sulog sa tubig.

Unya sa kalit si Abella nawagtang na , hinungdan nga ang mga kauban niini daling nangayo og panabang sa mga mananagat sa maong lugar.

Ang mga mananagat misakay sa ilang baroto nagdala og pukot ug dangtan pa og usa ka oras una nila hikit-i ang lawas ni Abella nga nadala sa ilang pukot.

Si Abella daling gidala ngadto sa Talisay City District Hospital apan wala na kini makaabot nga buhi diha sa maong tambalanan.

Ang mga mananagat nga nangita ni Abella mao sila si Teodoro Zafra, William Villanueva, Noel Lastimado, Doroteo Adlawan, Dennis Villavelez ug Felipe Savanico pulos taga sitio Kanipaan. (WC)  (BANAT NEWS)