Suspetsadong tulisan nadakpan

CEBU, Philippines - Usa ka tawo nga nagtangkil og armas de fuego kinsa gikatahapang tulisan gisikop sa kapolisan didto sa dalan J. Plaridel ug eskina A.C. Cortes Avenue sa barangay Cambaro, dakbayan sa Mandaue sa miaging kaadlawon.

Giila ang nadakpan nga si Rodel Donos, 31, ulitawo, nga taga sitio Pit-os, barangay Talamban, dakbayan sa Sugbo kinsa nakuhaan og usa ka kalibre .38 nga revolver ug mga buhing bala, usa ka pakete nga shabu ug kahimanan sa paggamit niini.

Si Inspector Willian Abot, hepe sa kapolisan sa Presinto 5 sa barangay Opao ug Mandaue City Police Office (MCPO) nga nahinabi sa Banat News miingon nga sa sayo pa nakadawat sila og tawag sa telepono gikan sa usa ka nagpakabanang lungsoranon nga mihangyo sa pagsusi sa maong lalaki nga nagdala og armas kinsa nagbarog-barog sa atbang sa usa ka tindahan sa pizza pie sa maong dapit.

Matud pa ni Inspector Abot nga miresponde dayon sila sa maong hangyo ug usa ka pribadong sakyanan ang ilang gigamit ug dihang ila kining girikisa mihana kini og lanit sa iyang armas de fuego hinungdan nga gipugngan dayon sa mga otoridad.

Si Inspector Abot miingon nga ang laing lalaki nga nagsakay og motorsiklo nga nagpaatbang sa ilang dinakpan, misirit og padagan sa iyang sakyanan pahilayo sa maong lugar.

Si Inspector Abot miingon nga dihang gisukit nila ang suspetsado ilang nasayran nga nalambigit na kini sa daghang kasong panulis sa Mandaue.

Wala hinuon angkona niini nga kauban niya kadtong nagmotor nga daling misibat pag-abot sa kapolisan.

Dugang pa ni Abot nga giangkon sa maong suspetsado nga siya maoy mipatay sa usa ka drayber sa taxi nga taga lungsod sa San Fernando nga ilang gitulis ug didto ilabay sa barangay Pulang Bato, sa dakbayan sa Sugbo dili pa dugay.

Gitanggong na karon sa detention cell sa Presinto 2 sa Opao Police Station sa MCPO ang suspetsado. (WC)(BANAT NEWS)