Pusher sikop uban sa 8 ka putos shabu

CEBU, Philippines - Nasakmit sa kapolisan ang walo ka pakete nga gituohang shabu gikan sa usa ka 23 anyos nga lalaki kinsa nadakpan sa kapolisan sa buy bust operation didto sa sitio Sta. Cruz sa barangay Guizo, dakbayan sa Mandaue sa miaging gabii.

Ang nadakpan mao si Robert Lee Delima, ulitawo, nga nagpuyo sa maong dapit.

Ang nakadakop nga sila si Inspector Wilson Abot, hepe sa kapolisan sa Presinto 5 sa Opao Police Station mibutyag sa Banat News nga sa sayo   pa nakadawat sila og kasayuran labot sa illegal nga kalihokan sa maong suspetsado sa nahisgotang lugar ug sa kasilinganan pang mga barangay sa maong dakbayan. Matud pa niya nga sukad niadto ila dayong gipanid-an ang maong suspetsado hangtod nga ilang nasuta nga positibo ang taho nga ilang nadawat .

Busa mipahigayon dayon sila og buy bust operation pinaagi sa ilang police decoy nga maoy nakigsabot kang Delima nga kunohay mopalit kini og shabu.

Matud pa ni Abot nga dungan sa pagtunol sa suspetsado sa 8 ka paketeng shabu ngadto sa police decoy, gisignit usab dayon kini sa kapolisan nga nagpahipi ra sa palibot   niadtong tungora.

Ang kasong kalapasan sa Republic Act 9165 kon Comprehensive Dangerous Drug Act of 2002 maoy isang-at batok sa suspetsado kinsa nagpahayahay na karon sa prisohan.    - (BANAT NEWS)