2 batan-on gipamusil

CEBU, Philippines - Grabeng naangol ang duha ka mga batan-ong babaye ug lalaki dihang gipamusil sa duha ka tawong nagsakay og motorsiklo alas-2 pasado ang takna sa miaging kaadlawon sa sitio Suba sa barangay Poblacion, lungsod sa Liloan.

Si PO2 Ritchel Jugalbot sa kapolisan sa maong lungsod miila sa mga biktima nga mao sila si Marjorie Quiatchon, 24, ug Brent Mariquit, 23, nga pulos molupyo sa maong dapit.

Matud pa ni Jugalbot nga kuyog ang duha ka biktima nga nag-inom sa daplin sa karsada dihang nalabyan sa usa ka motorsiklo nga kalit mihunong sa ilang atbang ug ang backrider mipusil kanila.

Dugang pa ni Jugalbot human sa maong pagpamusil ang duha ka wala hiilhing lalaki dali usab nga nakapabulhot pahilayo sa maong dapit. Wala pa matino sa kapolisan unsay motibo sa maong krimen. Si Jugalbot miingon nga ang duha ka biktima nga nakabaton og daghang samad pinusilan sa ilang kalawasan nga dali nga gihatod sa pribadong tambalanan sa dakbayan sa Sugbo ang padayon pa nga giatiman sa mga doktor.  - BANAT NEWS