'Kawatan' gibugha patay

CEBU, Philippines - Maayong pagkabuslot sa dughan sa usa ka notadong kawatan ug mamarokay og drugas human kini gipusil sa wala pa mailhing tawo pasado ala-una sa kaadlawon sa dalan Arellano Looc barangay Poblacion lungsod sa Argao.

Ang biktima nailhan nga si Ricarte Mansueto Vega, 39, molupyo sa sitio Media barangay Poblacion sa maong lungsod.

Sa imbestigasyon sa kapolisan sa lungsod sa Argao nasayran nga ang biktima nagbaklay sa nahisgutang lugar sa diha nga naabot na kini sa ngiob nga bahin giingong kalit nga gibabagan sa mamumuno ug gipusil.

Ang biktima naigo sa walang bahin sa iyang dughan apan dali kini nga nakadagan patubang sa nagtapok nga mga estambay ug nangayo og tabang apan kalit lang kini nga natumba.

Sa diha nga miresponde ang kapolisan wala na silay naabtan nga mamumuno samtang ang biktima gidali usab pagdala sa Isidro C. Kintanar Memorial Hospital apan gideklarar kini nga dead on arrival.

Sa pakighinabi sa Banat News sa hepe sa Argao police Senior Inspector Wilbert Parilla, mitug-an kini nga naglisod sila karun sa pagsubay sa mamumuno sa biktima tungod kay walay bisan usa nga mipatim-aw nga saksi sa maong panghitabo.

Matud pa ni Parilla nga aduna silay duha ka anggulo nga gisubay karun kalabot sa biktima kini mao ang iyang pagkamamarokay sa ginadiling drugas ug ang giingong iyang pagka-notadong kawatan sa maong lugar.

Midugang si Parilla nga base sa iyang nasayran anaa sa ilang listahan sa drug personalities ang biktima hinungdan nga posibleng mao kini ang hinungdan nga gipatay kini.

Samtang wala usab nila isalikway nga posibleng adunay nagdumot niini tungod sa giingong pagpanghilabot niini sa butang sa uban.

Butyag usab ni Parilla nga ka-upat na usab mapusili ang biktima sa miaging tuig apan wala kini mopasaka og kaso.

Gihulagway usab ni Parilla nga mao kini ang ilang dakong problema matag adunay mahitabong pinusilay sa ilang lungsod tungod kay walay mobarog nga saksi.

Gani ang igsuon sa biktima gipusil patay sa maiging tuig diin ang biktima nakakita gyud sa maong panghitabo apan wala kini mibarog isip saksi tungod sa kahadlok nga maoy bawsan. (EIM) - BANAT NEWS