Kompaniya sa Hapon dinhi malinawon

CEBU, Philippines - Gibutyag ni Gobernador Gwendolyn Garcia nga daghang mga kompaniyang Japanese dinhi sa Sugbo nga wala maapektohi sa linog ug tsunami ug sa mibuto nga nuclear plant sa nasud sa Japan dili pa dugay.

Matud pa sa gobernador nga iyang naklaro ang maong kahimtang sa mga Japanese companies dinhi sa Sugbo atol sa pagduaw sa iyang buhatan ni outgoing consul Toshio Okajima sa Japan uban ang incoming Japan consul nga si Yashiaki Hata.

Si Garcia nagkanayon nga nagpadayon ang operasyon sa mga Japanese companies dinhi sa Sugbo human mopasalig ang Japan consul nga magpabilin nga mamatigayon dinhi ang ilang mga investor.

Atol sa pagbisita sa buhatan sa gobernador si Okajima nga nagsul-ob og barong Tagalog nagpasalamat pag-ayo kang gobernador Garcia sa kanunay nga pag-imbetar niini sa mga kalihukan sa lalawigan.

Gani gipabasa pa sa gobernador sa opisyal sa Japan ang kopya sa speech unta ni Okajima sa naoktabang turn over of ceremonies sa usa ka proyekto sa kagamhanan dinhi nga suportado sa kagamhanan sa Japan nga nagpakita sa pagdayeg sa gobernadora ug sa iyang mga programa ilabina sa Suroy-Suroy Sugbo ug sa Cebu Expo.  (BANAT NEWS)