PO1 Mangubat nagmulto

CEBU, Philippines - Si PO1 William Mangubat Jr. giingong nagmulto diha sa dapit diin siya patya sa sitio Mananga 2, barangay Tabunok, dakbayan sa Talisay base sa report sa ABS-CBN Abante Bisaya.

Matud pa sa mga molupyo nga duol sa namatyan ni Mangubat nga makadungog sila panahon sa tungang gabii og kalangas sa maong lugar apan wala silay makitang mga tawo.

Kagahapon ang mga paryente ni Mangubat mipahibawo sa maong insidente ngadto kang Senior Inspector Errol Francis Deveyra, officer-in-charge sa Talisay City Police Station ug gitakdang moduaw sila sa maong lugar aron mangadye.

Matud pa ni Deveyra nga naghuwat siya sa mga paryente ni Mangubat nga mohapit sa iyang buhatan aron mapakuyogan niya kini og mga polis ngadto sa lugar.

Kahinumdoman nga si Mangubat gipusil patay sa duha ka tulisan nga iyang gigukod sa miaging semana.

Ang mga suspetsado sa iyang kamatayon mao ang magsuong Lito ug Jundy Oros ug Noel Simbajon alyas Noel Pacaña kinsa ang tulo padayon pa gihapong nagtago-tago.

Si Mangubat gilubong niadtong milabay’ng Sabado.  - BANAT NEWS