Traysikad kontrolado

CEBU, Philippines - Kontrolado na ang mga traysikad sa barangay San Roque, dakbayan sa Talisay pinaagi sa paghigpit   paagi sa pagrehistro sa maong mga sakyanan aron dyutay nalay makadagan-dagan sa kadalanan ug dili na makabalda sa dagan sa trapiko sa maong lugar.

Si Antonio Cabrera Jr. kapitan sa barangay San Roque, sa maong dakbayan mibutyag sa Banat News nga sa iyang barangay mikabat sa 700 ang nag-drive og traysikad, ug 300 usab ka mga operator niini.

Matud niya nga matag operator nanag-iya og 20 ka mga unit paubos.

Aron makontrolar, ang mga operator nga may 20 ka traysikad, 10 na lang ang tugotang ma-renew ang rehistro, ug kadtong may 10 ka unit, lima nalay tugotang makadagan.

Matud niya nga gikinahanglan nga ma-regulate ang mga traysikad sa ilang lugar aron mahapsay ang ilang karsada.

Sa milabay’ng tuig ang mga drayber sa traysikad nagtukod og organisasyon ug gigahinan usab sila og pundo sa barangay aron ang mga drayber pweding maka-loan.

Ang matag miyembro sa organisasyon unipormado nga magmaneho sa iyang traysikad.

Ang mga traysikad gidid-an sa paggawas sa dagkong karsada aron malikayan ang disgrasya ug gitugotan ra sila sa pagdagan-dagan sa mga suotong kadalanan sa barangay. (BANAT NEWS)