Task Force Ellah Joy may gisundang suspek

CEBU, Philippines - Gibalhin na sa kapolisan ang atensyon sa ilang imbestigasyon sa laing gidudahang maoy responsable sa pagdagit ug pagpatay sa 6-anyos nga tinun-an sa Calajoan Elementary School nga si Ellah Joy Pique sa lungsod sa Minglanilla.

Kini human gibasura sa piskalya ang kasong gipasaka sa kapulisan sa probinsya batok nila ni Sven Erik Berger ug sa uyab nga Filipinang si Karen Castro Esdrelon may labot sa maong hitabo.

Ang hepe sa kapulisan sa Central Visayas mipahibawo kagahapong adlawa nga duna na silay mga lugar nga gisuhid dinhi sa dakbayan ug sa probinsya nga posibleng gitagoan sa tinuoray nga mipatay sa bata.

Matud ni Ontog nga ang Task Force Ellah Joy miadto na sa mga dapit diin posibleng nagtago ang maong tawo, sumala pa niya mahimo nila kining dakpon dayon sanglit maisip nga kabahin gihapon kini sa hot pursuit operation.

Dugang pang Ontog nga aduna silay mga saksi karun nga mihatag kanila og impormasyon nga matumbok gyud ang tinuoray nga kriminal ni Pique.

Giangkon niini ang pagka-dismiss sa kaso nila ni Berger ug Esdrelon nakaapekto kanila lakip na sa mga turistang buot moanhi dinhi sa dakbayan sa Sugbu.

Sumala pa ni Ontog nga ang Criminal Investigation and Detection Group (CIDG) ug National Bureau of Investigation (NBI)-7 hilom nga milihok sa ilang tagsa-tagsa ka tahas aron mailhan ug madakpan ang tinuoray nga responsable sa krimen.  - BANAT NEWS