P21M 'EPHEDRINE'

CEBU, Philippines - Gibanabanang mokabat sa P21 milyones nga kantidad sa gidudahang ‘ephedrine’ nga kemikal nga sama sa gamiton paghimo og ‘shabu’ ang na-intercept sa Customs Sub-Port of Mactan gikan sa duha ka mga Chinese nationals diha sa arrival section sa Mactan Cebu International Airport kagahapon sa kaadlawon.

Gikostudiya karon sa mga awtoridad sila si Xiu Yu Tan kinsa upat ka bulang mabdos ug Iek Man Wong, pulos mga Chinese nationals nga luwan sa Cebu Pacific flight 5J 239 gikan sa nasud sa Hong Kong ug miabot 4:30 kagahapon sa kaadlawon sa MCIA.

Kini samtang gipailawom pa sa makuting laboratory test ang kemikal nga nakuha gikan kanila.

Sumala pa sa mga awtoridad ang bagahe ni Tan mano-manong giinspeksyon sa mga customs examiner nga sila si German Antopina ug Ervin Ho tungod kay naguba ang ilang X-ray machine ug tungod kay kadudahan ang mga linihukan sa duha.

Atol sa paghiling ni Antopina sa bagahe ni Tan nakita ang 2,700 ka gagmay’ng pakete nga makaduda ang hitsura ug P20 mil dolyares cash lakip na ang nagkadaiyang tambal.

Tungod niini dali nilang gi-hold ang bagahe ug ang duha ug daling mitawag sa Philippine Drug Enforcement Agency- 7.

Ang deputy director sa PDEA-7 nga si Levi Ortiz ug ang chemist nga si Jonah Macarambon sa gihimong inisyal nga ‘ephedrine test’ sa maong kemikal miingon nga adunay presensiya sa ephedrine chemical ang maong bagahe.

Matud pa ni Cebu Customs District Collector Ronnie Silvestre nga gibanabanang mokabat sa P21 milyones ang kantidad sa maong mga kemikal nga gibana-banang tulo ka kilo ug nagkantidad matag kilo og P7 milyones.

Sumala ang Silvestre adunay mga higayon nga maguba ang ilang mga x-ray machines maong himuon nila kini pinaagi sa manual inspeksyon.

Si Tan hugot nga mihimakak sa alegasyon sa mga operatiba sa Customs ug PDEA 7 nga “ephedrine” ang nakuha diha sa iyang bagahe ug nangangkong sagol kini sa pagkaon, sama sa pagpatubo sa grano sa mongos ug uban pang kagamitan sa pagluto.

Apan matud pa ni Ortiz ila unang ipailawom sa confirmatory test sa ilang laboratoryo ang maong nakuhang kemikal.

Gibutyag usab ni Customs Sub-Port of Mactan OIC Collector Ester Nario nga si Wong kanunay nang mosulod-gawas sa nasud, base sa ilang record 17 ka higayon na kining misulod sa MCIAA sukad pa niadtong Enero 12, 2010.

Samtang pito na ka higayon si Tan nagbalikbalik sa Pilipinas sukad niadtong Marso 2, 2010 apan karon lang kini nakasugat og problema sa ilang bagahe sud sa maong tugpahanan. – EIM(BANAT NEWS)