Duha gipareglaha'g dunggab

CEBU, Philippines - Nabulit sa mga samad ang lawas sa duha ka trabahante dihang gipanunggab sila sa upat ka lalaking wala hiilhi   didto sa barangay Mactan, dakbayan sa Lapulapu sa miaging gabii.

Ang mga biktima mao sila si Antonio Anter Endino, 32, minyo nga taga Poblacion, Pinamungahan ug Pablo Guanzon, 40, minyo nga taga dakbayan sa Toledo, ug mga trabahante sa Hi-Speed Construction sa barangay Mactan.

Sa imbestigasyon nga gihimo nila ni PO3 Manolito Abellanosa sa Crimes Against Person sa kapolisan sa maong dakbayan, nasayran nga gikan pang nagkantakanta sa videokehan sa maong dapit ang mga biktima ug padulong na sila sa pagpauli sa compound sa construction firm nga ilang gitrabahoan.

Apan nalabyan sa mga biktima ang upat ka batan-ong lalaki nga nag-estambay sa gawas sa Big Foot sa maong dapit unya kalit lang mibabag sa dalan dayon gipanunggab ang mga biktima.

Human sa pagpanunggab misibat usab dayon ang grupo ug gibiyaan ang mga biktima.

Ang mga tawo sa maong lugar maoy mihatod kanila ngadto sa Lapulapu City District Hospital unya gibalhin kini ngadto sa Vicente Sotto Memorial Medical Center sa dakbayan sa Sugbo.

Si PO3 Abellanosa miingon nga nagtuo sila nga gipareglahan sa maong grupo ang mga biktima.  - BANAT NEWS