Naghuramentado mipatay sa tiguwang suspek napusilan

CEBU, Philippines - Usa ka tiguwang babaye ang diriyot mapunggotan og ulo ug namatay human kini gitigbas sa usa ka lalaking gikatahong ‘gisul-an’ sa sakit ug kalit nga naghuramentado diha sa sitio Ibo sa barangay Biasong sa lungsod sa Balamban niadtong Lunes sa hapon.

Ang biktima nga lola nga naputos og samad tinigbasan sa pinote ang kalawasan mao si Samera Cudiz, 63, molupyo sa nahisgutang lugar.

Samtang talandugon usab ang kahimtang sa 42- anyos nga suspek nga si Joel dela Cerna, 42, human kini gipusil sa mga mirespondeng polis. Matud pa sa mga kabanay niini nga adunay deperensya sa pangisip si dela Cerna.

Matud ni PO3 Julius Obanana sa Balamban Police Station dihang nahinabi sa Banat News subay sa imbestigasyon ang suspek kalit gisul-an sa iyang sakit nga nerbiyos ug kalit nga mikuha’g duha ka pinute diha sa ilang balay dayun migawas ug nagwisiwisi niini.

Giingong ang tanang tawong makit-an ni Dela Cerna niadtong higayuna iyang gipanigbas apan nakadagan hangtud nga nasugatan niini ang biktima kinsa iya dayong gitigbas makadaghang higayon.

Sumala pa sa mga testigo ngadto sa kapolisan maayong pagkaigo sa tangkugo sa biktima ug dihang gi-usban pagtigbas naigo na usab sa agtang niini ug sa ikatulong pagtigbas naigo nasab sa ubolbol maong nitu-ay ang ulo una pa mahagba sa yuta. Ang inahan sa suspek nga si Lucia dela Cerna, maoy mitawag og polis tungod sa gibuhat sa anak kinsa padayong nagbahas-bahas sa dalan nga nagbitbit sa duha niini ka pinute nga nagkadugo pa.

Sila si PO3 Celso Diaz, PO2 Jose Baldecaza ug mga kaubanan pag-abot sa maong dapit nasugatan nila dayon ang suspek nga nagwarawara pa sa pinute hinungdan nga ilahang gisinggitan sa pagbutang niini.

Apan inay nga mopatuo gi-atake hinuon niini ang mga polis hinungdan nga gipasalbahan kini apan padayon gihapon kini og atake ug nakatigbas kang PO3 Diaz.

Maayo nalang nga wala kini maigo hinungdan nga napugos og pusil ang maong polis ug si PO2 Baldecaza kaniya sa kilid nga bahin sa lawas, tiil ug sa walang paa hinungdan nga nalup-og kini.

Human niini daling gidisarmahan ang suspek ug gihatod sa Balamban District Hospital ug gibalhin sa Vicente Sotto Memorial Medical Center (VSMMC)