Construction worker nga 'asset' gipatay
CEBU, Philippines - Gipusil patay ang usa ka construction worker sa duha ka wala mailhing armadong lalaki samtang naglakaw sa karsada sa miaging alas-11 sa gabii diha sa sitio Ubos Puso sa barangay San Nicolas siyudad sa Sugbu.
Si Sherwin Roda, 30, nagpuyo sa sitio Syco sa susamang barangay gideklarar sa mga doktor sa Cebu City Medical Center (CCMC) nga dead on arrival (DOA) human nahiagom og daghang samad pinusilan sa kalawasan.
Si SPO3 Rey Cuyos, imbestigador sa Homicide Section sa Cebu City Police Office nagkanayon nga subay sa gitug-an sa nakasaksi nga nakita-an ang biktima nga nagdagan ug dunay duha ka tawo nga naggukod ug nagsige og pusil niini.
Ang biktima nga naigo sa nagkadaiyang bahin sa kalawasan nahagba ug gidali pagdala sa mga tanod sa CCMC apan patay nang daan nga naabot sa nahisgutang tambalanan.
Atol sa pagkutlo ning balita wala pay mitumaw nga saksi nga nagtug-an sa background sa biktima gawas sa iyang pagka construction worker apan wala pa sab kini klaro iyang trabaho kay sige man kini og undang-undang.
Sa report sa Buena Mano kagahapon, giingong usa ka asset sa militar si Roda ug giingong nabilanggo na usab kaniadto tungod sa kaso sa ilegal nga drugas.
Matud ni Cuyos nga ilaha pang palawman og maayo ang imbestigasyon aron ilang mahibaw-an kun nganong gipusil patay ang biktima. (BANAT NEWS)
- Latest
- Trending
