Drayber gikulata sa tulisan

CEBU, Philippines -  Nabulit sa samad ug bun-og ang kalawasan sa usa ka drayber sa taxi nga gitulis sa duha ka pasahero niining lalaki didto sa sitio Tonggo, Barangay Marigondon, dakbayan sa Lapulapu sa miaging gabii.

Ang biktima mao si Johnny Buenchillo Lim, hingkod, minyo nga taga dalan M.C. Briones, sa barangay Guizo, dakbayan sa Mandaue ug drayber sa K.I. taxi nga nagdala sa plate number 353.

Si SPO3 Frederick Islet sa Theft and Robbery Section (TRS) sa kapolisan sa maong dakbayan miingon nga giluwanan sa duha ka wala hiilhing lalaki ang biktima gikan sa barangay Mabolo sa dakbayan sa Sugbo paingon ngadto sa barangay Marigondon dihang pag-abot nila sa nahisgutang lugar kalit lamang kining mimandar sa drayber sa pagpahunong sa sakyanan uban sa pagtion og kutsilyo sa liog niini ug mideklarar nga tulis.

Gumikan kay nagdumili ang biktima sa paghatag sa iyang kita, nagkarambola sila sa sulod sa taxi .

Si SPO3 Islet miingon nga gawas nga giligid og sumbag, giparok pa ang ulo sa biktima sa windshield sa iyang taxi.

Dugang pa ni SPO3 Islet nga dihang mihutlay na sa kabun-og ang biktima, dali kaayong gisakiyo sa mga tulisan ang kita niya nga balor og P900   dayong panibat niini ug gibiyaan ang biktima nga luya na kaayo.

Matud pa ni Islet nga ang mga sakop sa Emergency Rescue Unit Foundation (ERUF) maoy mikuha sa biktima ug gidala kini sa Vicente Sotto Memorial Medical Center ug kasamtangan kining giatiman sa mga doktor.

Padayon pang gipangita sa kapolisan ang maong mga tulisan. (BANAT NEWS)