Mananagat na-missing nakit-an

CEBU, Philippines -  Ang usa ka mananagat ang giingong na-missing ug gikareport na sa iyang anak ngadto sa kapolisan sa dakbayan sa Talisay niadtong Lunes sa buntag tua ra sa isla Cuaming, sakop sa lalawigan sa Bohol.

Si Oliver Mabala, hingkod, nga taga sitio Rattan, barangay Tangke, sa maong dakbayan maoy mipahibawo sa Talisay Police Station nga ang iyang amahan nga si Bonifacio Mabala, 64, wala na mauli sa ilang balay gikan sa pagpanagat niini niadtong Domingo.

Si Oliver mibutyag ngadto sa mga polis nga niadtong Domingo sa alas 3:00 sa kaadlawon sakay sa usa ka baroto ang iyang amahan nga miuban sa ubang mga mananagat aron managat ngadto sa kalawran sa Cuaming sakop sa isla sa Bohol apan sa oras sa iyang pagpa-blotter wala pa mahiuli ang iyang amahan.

Base sa report sa ABS-CBN Abante Bisaya kagahapon sa buntag ang pamilya ni Bonifacio nakadawat og mensahe sa text gikan sa ilang mga paryente didto sa Cuaming nga didto makadunggo si Bonifacio sa ilang lugar.

Nasayran nga samtang nanagat ang grupo ni Bonifacio kalit lang mihapak ang unos ug midagko ang mga bawod sa dagat hinungdan nga nag-iyahay sila og luwas sa ilang kaugalingon.

Gikataho nga kataposang nakit-an sa iyang mga kauban si Bonifacio nga nagpaanod sa bawod paingon ngadto sa Cuaming.

Apan bisan pa sa mensahe nga nadawat gikan sa ilang mga paryente nabalaka gihapon ang mga anak ni Bonifacio tungod kay hangtud sa pagsuwat niining balita ang maong mananagat wala pa mahiuli sa ilang balay. (BANAT NEWS)