Tiguwang nalatayan og trak tipi

CEBU, Philippines - Maayong pagkapisat sa usa ka lalaki human kini nalatayan sa usa ka 10-wheeler truck pasado alas-5 sa miaging hapon sa barangay Lipata lungsod sa Minglanilla.

Ang biktima nailhan nga si Galo Nasareno Merambel, 71, molupyo sa Deca Homes Subdivision barangay Tungkil sa maong lungsod. Base sa imbestigasyon sa kapolisan sa lungsod sa Minglanilla nasayran nga ang biktima nagsakay sa iyang mountain bike nga kolor yellow patubang sa national highway sa maong lungsod.

Samtang ang trailer truck nga gimaneho ni Jurime Pardillo Juarez, 26, patubang nga mosulod sa Deca Homes sa maong lungsod nianang tungura dihang giingong kalit natumba sa karsada si Merambel.

Naatlan usab nga miagi ang maong trak ug nalatayan ang lawas sa biktima nga miresulta sa iyang kamatayon.

Ang drayber sa maong trak kasamtangan nang gitanggong sa Minglanilla Police Station apan kagahapon pasado ala una sa hapon gibuhi-an kini human nakig-areglo sa pamilya sa biktima. Samtang sa pakighinabi sa Banat News ni PO1 Abelardo Biton sa Minglanilla Police Station nga sa wala pa mahitabo ang aksidente daw nawad-an sa kontrol ang biktima sa iyang mountain bike maong natumba kini. (BANAT NEWS)