BID official gidakop

CEBU, Philippines - Gisikop sa mga sakop sa Criminal Investigation and Detection Group (CIDG)-7 ang supervisor sa Bureau of Immigration and Deportation (BID) kagahapon sa ala 1:30 sa kaadlawon sulod sa buhatan niini diha sa Mactan Cebu International Airport Authority (MCIAA).

Si Fernando San Ramon, 51, taga barangay Kasambagan siyudad sa Sugbu gisikop sa CIDG-7 pinangulohan ni PO3 Arnold Bocayong ug mga kauban pinasikad sa warrant of arrest sa kasong libelo nga giisyu ni Judge Sylva Paderanga sa Regional Trial Court (RTC) branch 16 nga gipasaka batok kaniya ni assistant Cebu City Prosecutor Mary-ann Castro.

Ang korte mimando kang San Ramon nga mopiyansa og P10 mil alang sa temporaryo niini nga kagawasan.

Si Sr. Insp. Ricky Neron sa CIDG nga nahinabi sa mga tigbalita mibutyag nga niadtong miaging adlaw pa nila nadawat ang kopya sa warrant of arrest batok kang San Ramon.

Si San Ramon na-detained sa karsel sa CIDG apan human sa pito ka oras mipiyansa kini og P10 mil sa korte pasado alas-8 kagahapon sa buntag. - BANAT NEWS