Menor gipusil angol sa tulisan

CEBU, Philippines -  Nalandig sa tambalanan ang usa ka menor de edad human kini pusila sa usa ka tulisan didto sa barangay Poblacion, dakbayan sa Danao sa miaging adlaw.

Ang biktima mao si Kevin Emm Laude Sorilla taga sitio Tac-an, barangay Taboc sa nahisgutang siyudad kinsa nakaangkon og usa ka samad pinusilan sa iyang buko-buko, samtang ang suspetsado giila lang sa ngalang “Judel” nga taga sitio Ilaya, Poblacion, sa maong dakbayan.

Base sa imbestigasyon sa kapolisan nga si Sorilla nag-estorya og ang iyang uyab sa usa ka payag sa lugar nga nahitaboan dihang kalit lang mitungha si Jude ug miti-on og pusil ngadto kanila ug mideklarar og “hold-up”.

Gikuha sa suspetsado ang Sony Ericsson nga cell phone ug kwarta nga P60 ni Sorilla.

Wala pa makontento mimando usab kini nga ihatag usab ngadto kaniya ang cell phone sa uyab ni Sorilla apan ang biktima nagdumili og tuman sa maong mando hinungdan nga nasuko ang maong tulisan ug gipusil niini ang biktima.

Gihatod dayon ngadto sa Danao District Hospital ang biktima apan gibalhin usab kini sa tambalanan sa dakbayan sa Sugbo samtang padayon pang gipangita sa kapolisan ang suspetsado. (BANAT NEWS)