Gwen mahinumdom ni Remonde

CEBU, Philippines -  Giangkon ni Gobernador Gwendolyn Garcia nga sa Fluvial Procession alang ni Senior Santo Niño ugma makapahinumdom kaniya kang anhing Press Secretary Cerge Remonde kinsa namatay tungod sa atake sa kasingkasing niadtong milabay nga tuig.

Matud pa sa gobernador nga ang fluvial procession sa miaging Enero 2010 maoy katapusan nilang panagkita ni Remonde.

Miingon ang gobernador nga samtang malipayon kaayo siya niadtong tungora kay kauban niya ang iyang running mate nga si vice gubernatorial candidate Glenn Soco, nakita niya si Remonde nga nagsakay sa galleon nga gikargahan sa imahe ni Santo Niño ug nagngising mikawaykaway sa iyang kamot kaniya nga iya usab gibaslan og kawaykaway sa iyang kamot.

 Matud pa sa gobernador nga wala niya damha nga mao na diay kadto ang iyang katapusang paghimamat sa usa sa labing suod nga higala nga si Cerge Remonde. (BANAT NEWS)