Wire sa water pump mipatay'g babaye

CEBU, Philippines - Usa ka babayeng mag-uuma nakabsan sa kinabuhi human kini makahikap sa panit nga extension wire sa usa ka water pump didto sa barangay Danasan, syudad sa Danao kagahapon pasado ala-l:00 sa hapon.

Ang biktima nailhan nga si Lucila Roble Rubio, 44 , usa ka mag-uuma sa maong lugar.

Base sa inisyal nga imbestigasyon sa kapolisan sa syudad sa Danao nasayran nga ang biktima   nagtrabaho sa hacienda nga gipanag-iya sa usa ka Miguel Tionco.

Samtang ang biktima diha sa iyang trabaho wala mabantayi niini nga nahikapan niya ang napanitan nga extension wire sa water pump sa maong hacienda.

Mao nalay namatikdan sa mga nakasaksi nga kalit nga mikirig ang biktima tungod sa kakusog sa kuryente nga milatay sa iyang lawas.

Ang security guard nga si Adonis Manulat Montero sa maong hacienda dali nga mitawag   sa buhatan sa kapolisan sa maong dakbayan ug gipahibawo ang nahitabo sa biktima. Ang biktima giingong nakaangkon og grabing sunog sa iyang kalawasan ilabi na sa iyang duha ka kamot, tiil ug uban pang bahin sa lawas nga maoy hinungdan sa hinanaling kamatayon niini.

Gisuta karon kun wala bay tulubagon ang tag-iya sa water pump nga nakapatay sa biktima. - BANAT NEWS