Imbestigasyon sa kamatayon sa sikyu gipalawman

CEBU, Philippines - Ang kapolisan sa dakbayan sa Talisay padayon pang mipalawom sa imbestigasyon bahin sa gipusil patay nga headguard sa Alfa Executive Homes sa barangay Lawaan III, sa maong dakbayan, sa miaging buwan.

Kini samtang si Bensing Reguindin kinsa usa ka customs broker ug kandidato sa pagka-konsehal kaniadto sa Talisay maoy gipasanginlang utok sa kamatayon sa biktima nga si Rolly Rodrigo.

Si Rodrigo gipusil niadtong buwan sa Disyembre sa milabay’ng tuig samtang nagsakay sa iyang motorsiklo paingon sa balay nila nga nahimutang sa Alfa Executive Homes gikang naghatud sa iyang anak sa eskuylahan sa barangay Lawaan I.

Si Supt. Henry Biñas, hepe sa Talisay City Police Station mibutyag sa mga tigbalita nga kutob sa ilang madawat nga impormasyon kabahin sa maong hitabo ila dayon kining imbestigahon ug paladman.

Ang kapolisan aduna nay gisundan karong mga tawo nga may kalambigitan sa pagpatay ni Rodrigo.

Kahinumdoman usab nga ang kanhi sakop sa Talisay City Intelligence Bureau nga si Jolito Labrador kinsa giingong maoy gisugo og pagpangita og tawo nga maoy mopatay kang Rodrigo bugti sa P17 mil nga suhol, gidakop sa kapolisan sa Talisay pinasikad sa search warrant nga giluwatan sa korte tungod kay ang mga polis nakadawat og impormasyon nga aduna kini armas nga walay lisensya.

Si Labrador nasakmitan og mga armas de fuego ug napasakaan og kasong illegal possession of firearms sa Talisay City Prosecutors Office apan temporaryo kining gawasnon karon human makabutang og piyansa.

Matud ni Biñas nga si Labrador dili nila matumbok nga mao gyu’y suspek sa pagpatay ni Rodgrio tungod kay walay mga testigos nga makatudlo kaniya ug wala usab sila’y mga lig-on nga ebidensiya batok kaniya.

Sa pagkakaron giangkon ni Biñas nga usa sa ilang problema mao ang kakuwang og mga saksi nga mobarug sa korte pabor sa biktima.

Si Binas midugang nga usa sa ilang gitutokan karon mao ang bahin sa panagbangi sa mga molupyo sa subdivision nga miresulta sa pagpusil patay kang Rodrigo. - BANAT NEWS