ANS gihapon; Talamban Elementary School misakmit sa Elementary Level

CEBU, Philippines - Pabiling gikuptan sa Abellana National School ang titulo sa   Sinulog sa Kabataan sa Dakbayan karong tuiga alang sa secondary level ug misakmit usab sa best in costume ug best in musicality.

Nagkanayon ang choreographer sa maong tunghaan nga si Walter Betito nga kapin sa usa ka buwan ra ang ilang praktis gumikan kay dili siya gusto nga maapektohan ang oras tingklase sa mga estudyante.

Ang Don Sergio Osmeña Memorial National High School maoy nakasakmit sa ikaduhang puwesto, samtang ang Apas National High School   maoy milangkat sa ikatulo nga puwesto.

Nakuha usab sa Tisa Night High School ang ikaupat nga puwesto ug nahimutang usab sa ikalimang puwesto ang Pardo Night High School.

Samtang sa elementary level, naangkon sa Talamban Elementary School ang unang ganti ug ikaduha ang Mabolo Elementary School samtang ang Tejero Elementary School maoy nakaangkon sa ikatulong ganti.

Nakuha usab sa Pardo Elementary School ang ikaupat nga pwesto samtang nasakmit sa City Central School ang ikalimang puwesto.

Napili ang Talamban Elementary School   isip best in musicality ug best in costume sa elementary level.

Ang premyo sa unang ganti nagkantidad og P150 mil ug ang ikaduha nagkantidad og P100 mil, samtang ang ikatulo nagkantidad usab og P75 mil, ang ikaupat nagkantidad og P50 mil ug ang ikalima nagkantidad og P25 mil.

Sila si Mayor Michael Rama, Bise Mayor Joy Augustus Young, Konsehal Alvin Dizon ug ang mga kadagkoan sa Department of Education maoy mitunol sa mga tropeyo ug premyo ngadto sa mga mananaug. - BANAT NEWS