2 nasikop sa buy-bust

CEBU, Philippines - Nadakpan sa kapolisan ang duha ka managsuong lalaki nga gipasanginlang tigpayuhot og ginadiling drugas atol sa gipahigayong buy-bust operation didto sa A. Lopez St ,. sa barangay Calamba siyudad sa Sugbo sa miaging buntag.

Ang magsuong nadakpan giila nga sila si Rustom Diaz Pila 37, minyo, ug ang manghod niini nga si Roderick, 26, ulitawo, pulos nagpuyo sa nahisgutang lugar. Si Chief Insp. Romeo Santander, hepe sa City Intelligence Branch (CIB) sa Cebu City Police Office (CCPO) mitug-an nga nakadawat sila og tawag gikan sa usa ka concerned citizen sa nahisgutang lugar kalabot sa mga tawo nga namaligya og ginadiling drugas.

Dali niyang gipadala sa dapit ang iyang mga sakop aron pagsuta sa maong report busa gisuwayan dayon og palit og usa ka pakiteng shabu nga nagkantidad og P1,000 sa iyang decoy nga sibilyan si Roderick .

Unya human sa transaksiyon giposasan dayon si Roderick ug gisunod pagdakop ang maguwang niini nga si Rustom ug nakuhaan sila og 15 ka pakete sa gituohang shabu nga nagkantidad usab og P15 mil. Si Santander nagkanayon nga anaa sa level 2 ang managsuong Pila sa nahisgutang lugar.

Giandam na sa kapolisan ang kaso nga ilang ipasaka batok sa managsuong Pila nga kalapasan sa section 5 ug 11 sa Republic Act 9165 kon selling ug pushing. - BANAT NEWS