Suroy-suroy sa 2011 adto sa norte

CEBU, Philippines - Si Gobernador Gwendolyn Garcia mipatawag og meeting sa mga mayor sa lalawigan, mga tour operator, ug uban pang mga lokal nga opisayles sa kalungsoran aron masugdan na nila sa pagpangandam sa umaabot nga Suroy-Suroy sa Sugbo karong tuig 2011. Ang Suroy Suroy sa Sugbo sa 2011 ipahigayon sa mga kalungsoran sa amihanang bahin sa probinsiya sa Sugbo.Ang maong tigom nga gipasiugdahan ni Garcia gitambongan usab sa mga sakop sa hunta probinsiyal sa amihang bahin sa lalawigan.Matud pa ni Garcia nga importante gayud kaayo ang maong panagtagbo kay gusto niya nga madugangan pa ang pagpalambo sa lalawigan aron mas nindot kini nga bisitahan sa mga langyaw ug lokal nga turista. Gitataw sa gobernadora nga kini pa ang unang higayon nga ipahigayon ang Suroy-Suroy didto sa norte inig human sa Sinulog,   inay adto sa habagatan.

Nahisgotan usab sa maong tigom kung unsaon ang pag-asikaso sa mga turista ug ingon man ang pagpangandam sa mga dapit sa tagsa tagsa ka mga lungsod.

Gikalipay kini pag ayo sa mga mayor kay panahon na usab kini nga mabisita ang ilang tagsa- tagsa ka lungsod ug makita sila sa mga turista.

Ilang gitataw nga ilang ipakita kun unsa ka mapasigarbohon ang mga Sugboanon ubos sa pagpanguna ni Gobernador Garcia. Ang pagsanong sa mga opisyal sa amihanang bahin sa lalawigan nga nitambong sa maong tigom gikalipay usab og dako sa gobernador.

Kini tungod kay sigurado na ang Kapitolyo nga may kasaligang katabang   sa pagpalambo sa lalawigan sa Sugbo. (BANAT)