Devotee City sa moday-as andam na

CEBU, Philippines - Gipahibalo ni Konsehal Roberto Cabarrubias nga 80 porsiyentong andam na ang Devotee City nga ipahimutang kilid sa karaang Compaña Maritima Building.

Ang maong dapit maoy himuong temporaryong kapuy-an sa mga debotos ni Señor Sto. Niño gikan sa nagkalainlaing dapit sa probinsya nga mamista sa siyudad apan walay kaabtan dinhi sa siyudad.

Gibutyag ni Cabarrubias nga mao usab ang chairman sa Devotee City nga buksan ang maong area karong Enero 13 ug langkoban kini sa 110 ka container vans.

Mokabat sa P600,000 ang gigahin sa siyudad alang sa pagpatukod sa Devotee City ug gikataho nga duna pu’y mga kompanya nga nagbase sa siyudad ang mohatag usab og donasyon alang sa maong programa.

Alang sa mga debotos ni Sr. Sto. Niño nga gustong mopahimos niini gikinahanglan nga makapresentar og mga dokumento sama sa ticket sa bus aron makaparehistro sa Devotee City nga maka-okupar og 3,000 ka mga tawo.

Dugang pa ni Cabarrubias nga nakig-alayon na siya sa mga Cebu City Police Office alang sa higpit nga seguridad sa mga debotos diha sa Devotee City ug adunay idestino nga medical team aron ma-monitor ang kahimtang sa panglawas sa mga debotos.

Ang Visayan Electric Co. (Veco) maoy moayuda sa kuryente sa maong proyekto ug ang Metropolitan Cebu Water District (MCWD) maoy moabaga sa tubig.

Butangan usab kini og duha ka linya sa telepono aron mahimong magamit sa mga debotos ug sa unang higayon, aduna na’y video streaming ang Devotee City. (BANAT)